Хабари
баргузории Конференсияи байналмилалии «Забони тоҷикӣ (форсӣ) ва технологияҳои иттилоотӣ»
.
Рӯзи 28 майи соли 2008 дар маҷлисгоҳи Раёсати Академияи илмҳои Ҷумҳурии Тоҷикистон Конференсияи байналмилалии «Забони тоҷикӣ (форсӣ) ва технологияҳои иттилоотӣ» оғоз ёфт. Дар кори Конференсия донишмандон аз Ҷумҳурии Исломии Эрон ва Донишгоҳи Индианаи Штатҳои Муттаҳидаи Америка иштирок доранд. Конференсияро бо сухани муқаддимавӣ ноиби президенти Академияи илмҳои Ҷумҳурии Тоҷикистон академик Диноршоев М. Д. ифтитоҳ намуд.
Сипас суханрониҳо тибқи барнома бо гузориши Толиби Розӣ - Раиси кумитаи истилоҳот дар мавзӯи «Масоили умумии созгории забони тоҷикӣ бо технологияҳои иттилоотӣ ва баҳрагирӣ аз он» идома ёфтанд. Дар рӯзи аввали кори Конференсия гузоришҳои Хоҷаёров Насрулло (Донишгоҳи Индианаи ШМА), Қаҳрамон Сулаймонӣ (Ройзании фарҳангии сафорати ҶИЭ), доктор Фарибури Хусравӣ (Китобхонаи миллии ҶИЭ), Атоев Асомуддин (Тоҷикистон), Қосимов Рустам (Тоҷикистон), Комилов Файзалӣ (Тоҷикистон), доктор Алӣ Кофӣ (Ҷумҳурии Исломии Эрон) ва Талъат Нӯъмонов шунида шуданд.
Гузориши Хоҷаёров Насрулло дар мавзӯи «Истифодаи маводди чандрасонаӣ зимни таълими забони тоҷикӣ дар Донишгоҳи Индиана» ва ба маърази намоиш гузоштани корҳои анҷомдодаи ӯ бо истиқболи гарми иштирокдорони ҳамоиш пазируфта шуд.
Дигар ахбор: |