|
Ҷилди I: ФАРИДУН
БАР ТАХТ НИШАСТАНИ ФАРИДУН
Зи Заҳҳок шуд тахти шоҳӣ тиҳӣ,
Сар омад бар ӯ рӯзгори меҳӣ.
Пас огоҳӣ омад зи фаррухписар
Ба модар, ки фарзанд шуд тоҷвар.
Ниёишкунон шуд, сару тан бишуст,
Ба пеши ҷаҳондор омад нахуст.
Ниҳод он сараш паст бар хок-бар,
Ҳаме хонд нафрин ба Заҳҳок-бар.
Ҳаме офарин хонд бар кирдгор,
Бар он шодмон гардиши рӯзгор.
Аз он пас ҳар он кас, ки будаш ниёз,
Ҳаме дошт рӯзи бади хеш роз,
Ниҳонаш наво карду касро нагуфт,
Ҳамон рози ӯ дошт андар нуҳуфт.
1 2 3 4 5 6 7 >>> |