|
Ҷилди I: АНДАР СИТОИШИ СУЛТОН МАҲМУД
Ҷаҳондор - Маҳмуд, шоҳи бузург
Ба обишхур орад ҳаме мешу гург.
Зи Кашмир то пеши дарёи Чин
Бар ӯ шаҳрёрон кунанд офарин.
Чу кӯдак лаб аз шири модар бишуст,
Ба гаҳвора «Маҳмуд» гӯяд нахуст.
Ту низ офарин кун, ки гӯяндаӣ,
Бад-ӯ номи ҷовид ҷӯяндаӣ.
Напечад касе сар зи фармони ӯй,
Наёрад гузаштан зи паймони ӯй.»
Чу бедор гаштам, биҷастам зи ҷой,
Чӣ моя шаби тира будам ба пой.
Бар он шаҳрёр офарин хондам,
Набудам дирам, ҷон барафшондам,
1 2 3 4 5 6 7 >>> |
